Hirshabeelle oo dalbatay in gargaar loo fidiyo Dadkii ku barakacay dagaalladii ka dhacday Shabeellada dhexe

 

28-04-2019

 

Jowhar (SONNA) – Wasiirka wasaaradda dib u heshiisiinta Hirshabeelle, C/kariin Cali Nuur iyo wafdi uu hoggaaminayo oo dhowaanahan booqasho ku marayay degaannadii lagu dagaallamay ee Gobolka Shabeellada dhexe ayaa ku baaqay in gargaar Bini’aaddannimo loo fidiyo Dadka halkaasi ku tabaalaysan.

Wafdigan oo safar Dhulka ah ku maray , Burdheere, Qoodaar, Xaaji Cali , Raage Ceelle iyo degaanno kale oo hoos taga Cadale iyo Warsheekh, ayaa sheegay in la gubay qaar ka mid ah Tuulooyinkaasi, Dadka halkaasi ku suganna ay macaluul la Il-daran yihiin.

Wuxuuna Dowladda Federaalka, Maamulka Hrshabeelle iyo Beesha Caalamkuba ka codsaday in Gargaar deg-deg ah lala soo gaaro Dadka halkaasi kasoo barakacay oo ay isugu biireen Fatahaado iyo nolol xumo kale.

Wasiirka, ayaa intaa ku daray in ay la kulmeen qaar ka mid ah Culimada iyo wax garadka , wuxuuna sheegay in ay ka wada hadleen sidii degaannadaasi loogu soo dabbaali lahaa nabad gelyo, loona sii dardar gelin lahaa wada hadalladii u socday Labadii Beelood ee halkaasi ku dagaallamay.

Mudane,C/kariin Cali, Wasiirka dib u heshiisiinta ee maamul Goboleedka Hirshabeelle, ayaa sheegay in Dadka halkaasi kasoo bara kacay ay doonayaan in ay ku laabtaan degaannadoodii hore, balse inta ka horreysa loo baahan yahay in si fool ka fool ah ay isu soo hor fariistaan wax garadka iyo cuqaasha Labada dhinac, si loo soo gaba-gabeeyo dirirta sokeeye ee halkaasi ka aloosan.

 

Leave a Reply