Ergo Ka Socoto Qaramada Midoobay Ayaa Tagtay Magaalada Xuddur

 

17-06-2021

 

XUDUR – Ergodan oo ay kamid yihiin, Saraakiil ka socota Qaramada Midoobay iyo Hey’adaha kale ee Samafalka ka shaqeeya iyo Arrimaha Gargaarka Bani Aadanimada ayaa u kuurgalay Xaaladda Nolaleed ee Magaalada Xuddur oo Alshabaab u go’doonsan Muddo 10 sano ku dhow.

Ugu horeyn, Ergada ayaa kormeertay Xeryaha Barakacyaasha ee ku yaala Daafaha Magaalada Xuddur, halkaas oo ay ku nool yihiin Kumanaan Shacab ah oo Al-Shabaab ka soo barakiciyeen Tuulooyinkooda.

Wasiirka Gargaarka iyo Maareynta Musiibooyinka Maamul Goboleedka Koofur Galbeed, Cabdinaasir Cali Caruush, ayaa horkacayay Ergida, ayagoo la kulmay qeybaha Bulshada iyo Maamulka.

Sidoo kale, Mas’uuliyiinta ayaa kormeer indha indheyn ah ku sameeyay qaar kamid ah Suuqyada Magaalada Xuddur oo Xilligan gabaabsi ka yihiin Cuntooyinka quutul daruuriga ah.

Ergida waxay kulan la yeesheen Maamulada Degmooyinka Xuddur, Tayeeglow iyo Rabdhuure, waxayna si qoto dheer uga wada hadleen Xaaladaha Amni iyo tan Bani Aadanimo ee ka jirta Gobolka Bakool, gaar ahaan Degmooyinkaas.

Xigasho: Radio Muqdisho

Leave a Reply