War Ay Dowladda Qatar Kasoo Saartay Qaraxii Al-Shabaab Ee Ka Dhacay Xerada Ciidanka

 

16-06-2021

 

DOOXA, Qatar – Dowladda Qatar ayaa si kulul uga hadashay Qaraxii Ismiidaaminta ahaa ee Shalay ka dhacay Afaafka hore ee Xerada Tababarka Ciidamada ee Jeneral Dhega-badan ee Magaalada Muqdisho ee Caasimadda Dalka, kaasi oo geystay Qasaaro badan.

Wasaaradda Arrimaha Dibedda Qatar ayaa soo saartay Qoraal lagu cambaaraynayo Qaraxaasi oo ay ugu yaraan 20 qof oo dhammaantood ahaa dhalinyaro ku geeriyootay, halka ay in ka badan 40 kalena ku dhaawacmeen.

Qatar waxaa kale ay Tacsi u dirtay Saaxiibada Dowladda iyo Dhammaan Dadka Soomaaliyeed iyo inuu Allaah U Naxariisto Dadkii geeriyooday iyo inuu Caafimaad Deg-deg ah siiyo kuwii ku dhaawacmay Qaraxaas oo la dhigay Isbitaalo.

“Dowladda Qatar waxaa ay ku celineysa Mowqifkeeda adag ee Diidmada Rabshadaha, Argagixisada iyo Falal Dambiyeed, iyadoon loo eegin Ujeedada iyo Sababaha,” ayaa lagu yiri Qoraalka kasoo baxay Wasaaradda Arrimaha Dibedda Qatar.

Qof isku soo xiray Jaakad Walxaha Qarxa ayaa isku dhex qarxiyey Dhalinyaro farabadan oo dooneysay inay ku biiraan Ciidanka Xoogga Dalka, kuwaasi oo Saf dheer ugu jiray Diiwaan-gelin ka socotay Xerada Tababarka Ciidamada ee Jeneraal Cabdikariin Yuusuf Aadan (Dhega-badan) ee Magaalada Muqdisho, waxaana Mas’uuliyadda Weerarka sheegtay Al-Shabaab.

Xigasho: Radio Dalsan

Leave a Reply