Qarax Ka Dhacay Magaalada Kismaayo Iyo Faahfaahino Ka Soo Baxaya Qaraxaasi

 

03-06-2021

 

KISMAAYO – Qarax ahaa nooca Bambaanada Gacanta laga tuuro ayaa waxaa uu Xalay ka dhacay Isgoyska Somali Star ee Magaalada Kismaayo, waxaana ka dhashay Qasaaro kala duwan.

Goobjoogayaal ayaa waxaa ay sheegeen in Qaraxa Bambaano lagu weeraray Ciidamo katirsan Booliska Maamul Goboleedka Jubbaland oo ku sugan Isgoyska Somali Star, waxana Qaraxa ku dhaawacmay 7 Ruux oo u badan Ganacsato.

Sidoo kale Goobjoogayaasha waxaa ay sheegeen in Qaraxa uu Dhaawac culus kasoo gaaray Haweeney Caano ku iibineysay halka uu ka dhacay Qaraxa, taas oo dhaawaceeda la geeyay Isbitaalka Weyn ee Magaalada Kismaayo.

Taliyaha Ciidamada Booliska Maamul Goboleedka Jubbaland Maxamed Cabdi Sheek (Xujaale) ayaa sheegay in Qaraxaas ay ka dambeeyeen Ururka Al-Shabaab, isla markaana ay la beegsadeen Ciidamada Booliska, waxana uu xaqiijiyay inay Dad Shacab ah ku waxyeeloobeen.

Sidoo kale Taliyaha waxaa uu sheegay in Ciidamada Booliska ay sameeyeen Howlgallo ay ku baadi goobayeen Dadkii ka dambeeyay Weerarkii Bambaano, isla markaana Howlgalka ay ku qabteen Dad badan oo tuhmanayaan ah, ayna dhawaan soo bandhigi doonaan.

Weerarka Bambaano ee ka dhacay Magaalada Kismaayo ayaa waxaa uu kusoo aadayaa Xilli Habeenadii la soo dhaafay ay Howlgallo xiriir ah ka socdeen Xaafadaha kala duwan ee Magaalada Kismaayo.

Xigasho: Borama News

Leave a Reply