Taliye Ku-Xigeenkii Booliska Gobolka Banaadir Oo U Geeriyooday Dhaawacii Soo Gaaray

 

15-05-2021

 

MUQDISHO – Taliye Ku-xigeenkii Qeybta Guud ee Booliska Gobolka Banaadir Gaashaanle Sare Axmed Cabdi Wehliye ayaa u geeriyooday Dhaawac Culus oo kasoo gaaray Qaraxii 9kii Bishan ka dhacay Saldhiga Booliska Degmada Waaberi ee Magaalada Muqdisho ee Gobolka Banaadir.

Taliye Axmed Wehliye ayaa Maalmihii lasoo dhaafay Xaaladiisa Caafimaad lagula tacaalayay Isbitaalka Digfeer ee Magaalada Muqdisho, balse Caawa ayaa la xaqiijiyay inuu Taliye Ku-xigeenka u geeriyooday Dhaawicii soo gaaray.

Geerida Axmed Cabdi Wehliye ayaa waxaa ka tacsiyeeyay Taliska Ciidanka Booliska Dowladda Federaalka, Wasiirka Arrimaha Gudaha Xukuumadda Xilgaarsiinta Jeneraal Mukhtaar Xuseen Arfax iyo Mas’uuliyiin kale.

Qaraxii Is-miidaaminta ahaa ee lagu weeraray Saldhiga Booliska Degmada Waaberi ayaa waxaa lagu dilay Taliyihii Booliska Degmadaas Axmed Cabdullaahi Baashane, Taliye Ku-xigeenkii Qeybta Weliyow Cadde Gaashaanle Dhexe Cabdi Baasid Maxamuud, Askar Boolis iyo Dad caadi ahaa.

Al-shabaab ayaa sheegtay Mas’uuliyada Qaraxaas Is-miidaaminta ahaa ee ka dhacay Magaalada Muqdisho, isla markaana sheegay inay beegsadeen Saraakiil Ciidan oo ku sugneyd Saldhiga Booliska Degmada Waaberi ee Magaalada Muqdisho ee Gobolka Banaadir.

Xigasho: Radio Dalsan

Leave a Reply