DP World Iyo Dawladda Itoobiya Ayaa Kala Saxeexday Heshiis Ku Wajahan Marinka Berbera (Berbera Corridor)

 

07/05/2021

 

HARGEYSA (SOLNA) – Shirkadda DP World iyo Dawladda Itoobiya ayaa kala saxeexday Heshiis ku wajahan Hirgelinta iyo Casriyeynta Marinka Berbera (Berbera Corridor) ee isku xidhaya Somaliland iyo Itoobiya, kaasi oo Faa’iido weyni ugu jirto Itoobiya.

Sidaasna waxa lagu shaaciyey War-murtiyeed ka soo baxay Shirkadda DP World Maalintii Shalay (Khamiis) oo ay soo xigatay Wakaaladda Wararka Somaliland ee SOLNA. Heshiiskaas oo ay Addis Ababa ku kala saxeexdeen Guddoomiyaha Shirkadda DP World Sultan Ahmed Bin Sulayem iyo Wasiirka Gaadiidka ee Itoobiya Mrs. Dagmawit Moges.

Waxa kaloo kamid ah Heshiiskaas, Bakhaaro waaweyn oo laga dhisayo Marsada Berbera, Goobaha Koontiinarrada lagu dejiyo iyo Adeegyada Gudbinta Shixnadaha.

“Horumarinta Marinka Berbera (BerberaCorridoor), wuxuu noqon doonaa mid kamid ah Marinnada ugu waaweyn ee Ganacsiga, waxaanu Faa’iidooyin Dhaqaale u leeyahay Itoobiya,”ayuu yidhi Guddoomiyaha Shirkadda DP World Sultan Ahmed Bin Sulayem.

Guddoomiyaha DP World wuxuu intaas ku daray in Mashruuca Marinka Berbera (BerberaCorridoor), laga heli doono Shaqo abuur cusub, isla markaana soo jiidan doono Ganacsi iyo Maalgashi ballaadhan.

Shirkadda DP World waxay ku maalgalinaysaa Marsadda Berbera $442 Milyan oo Doolar, waxana dhammaad ku dhow Wejigii Koowaad ee Ballaadhinta Dekedda Bebera, waxaana lagu wadaa in lagu kordhiyo Dekedda Mustaqbalka 1,000 mitir, si ay Sannadkii Dekedda uga soo degaan 2 Milyan oo Kontiinar.

Jidka Berbera (Berbera Corridor) ayaa isku xidhaya Dekedda Berbera iyo Magaalo Xuduudda ku taalla ee Wajaale, waxaana maalgelinaya Waddadaas Hay’adda Horumarinta u qaabilsan Abu Dhabi iyo Hay’adda Horumarinta Caalamiga ah u qaabilsan UK, waxaana lagu wadaa in Jidkaasi uu dhammaado dabayaaqada sannadkan 2021ka.

 

Leave a Reply