Axmed Madoobe: Farmaajo Waxaa U Muuqda Kursiga Keliya, God Madow Ayuu Dalka Ku Wadaa

 

17-04-2021

 

KISMAAYO – Madaxweynaha Maamul Goboleedka Jubbaland Axmed Maxamed Islaam (Axmed Madoobe) ayaa ka hadlay Muddo Kordhintii Xildhibaanada Golaha Shacabka ay u sameeyeen Hay’addaha Dowladda Federaalka iyo Madaxweynaha Waqtiga Ka Dhamaaday ee Farmaajo.

Madaxweynaha Maamul Goboleedka Jubbaland Axmed Madoobe ayaa waxaa uu sheegay in uusan jirin Sharci Xildhibaanada Waqtigoodu Dhammaaday u ogolaanaya inay Muddo Kordhin Labo Sanno ah u sameeyaan Hay’addaha Dowladda, uuna Go’aankaas yahay mid Sharci Darro ah.

Waxaa uu sheegay in Xiligii la ansixinayay Heshiiskii 17-kii Sebtember lagu gaaray Muqdisho ay si wadajir ah u ansixieen Xildhibaanada Labada Aqal ee Baarlamaanka, wuuxuna sheegay in Golaha Shacabka uusan awood u laheyn inuu Go’aan ka gaaro Dalka.

Axmed Madoobe ayaa Madaxweynaha Muddo Xileedkiisa Dhammaaday ee Farmaajo ku eedeeyay in Dalka Soomaaliya uu kusii ridayo God Madow, ayna tahay in la iska qabto, hayeeshee haddii arrintaas ay dhici weydo uu dib u noqonayo Dalka.

”Madaxweynaha Xiligiisu Dhammaaday haddii aan Maanta la iska qaban, Wadankaan dib ayuu u noqonayaa, meel kale ayuu tagayaa; Maanta waxaad ogtihiin in Reer Muqdisho ay cabsi ku jiraan,”ayuu yiri Madaxweynaha Maamul Goboleedka Jubbaland oo ka hadlaayay Munaasabad Xalay lagu qabtay Magaalada Kismaayo.

Sidoo kale Madaxweynaha Maamul Goboleedkaasi Axmed Madoobe ayaa sheegay in Dadka ku nool Caasimadda Dalka ee Muqdisho ay heystaan Dhibaatooyin badan oo ay ku jiraan Cabsi Badan, isagoona uga mahadceliyay Shacabka Dul-qaadka ay muujinayaan, iyagoona og wixii lasoo maray.

Ugu dambeyn Madaxweynaha Maamul Goboleedka Jubbaland Axmed Madoobe ayaa Carabka ku dhuftay in Farmaajo uusan rabin in Dalka ay ka dhacdo Doorasho Xor, wuxuuna sheegay in Madaxweynaha Muddo Xileedkiisa Dhamaaday uu u muuqdo oo kaliya Kursiga uu ku fadhiyo oo markii hore ku yimid Doorasho Xor ah.

Xigasho: Daafeet News

Leave a Reply