Maxaa keenay In Madaxweyne Farmaajo Uu Hadda Saxiixo Heshiiskii Doorashada?

 

13-11-2020

 

Iyadoo xalay Madaxweyne Farmaajo uu saxiixay heshiiskii doorashada dadban ee ay wada saxiixdeen isaga iyo Madaxweynayaasha dowlad Goboleedyada 17-kii bishii September, ayaa waxaa soo baxaya dood sharciyeed ku aadan in xilligan Madaxweynuhu saxiixo, iyadoo la soo magacaabay Guddiyadii doorashada ee muranka badan dhaliyay.

Haddaba waxaa halkan ku falanqeynaynaa waxyaabaha muhiimka u ahaa in la sameeyo fulinta heshiiska doorasho, iyadoo jadwalkii la soo bandhigay sidii loogu tala galay aanu u dhaqan gelin.

Sharci doorasho lagu heshiiyay – Sharci ma noqdo illaa la helo qodobadan:

1. In Baarlamaanka uu ansixiyo
2. Madaxweynaha saxiixo
3. Faafinta rasmiga ah uu ku soo baxo.

Intaan marka la helo ayaa la fulin karaa.

Sida muuqata sharciga weli sharci ma aha illeen faafinta kuma soo bixin, Madaxweynahana xalay keliya ayuu saxiixay.

Haddii aan sharci la dabaqi karin illaa uu ka ansaxo, sharcigee loo cuskaday dhismaha guddiyaddii la magacaabay.

Sharciga uu madaxweynuhu saxiixay, waxaa ku qoran qodobbo ay ahayd in fulintooda ka taariikh horeeyay saxiixiisa, sidee sharci aan taariikhdiisa dib loo bedelin uu sidiisa ugu saxiixay?

Nuxurka:

– Guddiyada sharci ma aha marka muranka dhanka dhexdhexaadnimadoodaba laga tago.
– Su’aal waxaa taagan sababta uu intaan oo waqti ah u saxiixi waayay wax qalin keliya uga baahan oo aan aqrin iyo dersid uga baahneyn maaddaama uu heshiiska qeyb ka ahaa.

Waxaa la rumeysan yahay inay tani qeyb ka tahay ku tumashadii sharciga ee lagu eedeyn jiray Madaxweynaha, iyo inuu wado abaabul aan raali laga ahayn dib u dhigis ku guuleysi doorasho hal dhinac ah ama inuu waqtiga ku sii dheereysto.

Ugu dambeyn saxiixan xilligan uu Madaxweynuhu ku soo aadiyay heshiiska doorashada ayaa loo arkaa mid Madaxweynuhu ku xalaaleynayo Guddiyadii la magacaabay ee muranka ka dhashay.

Xigasho: Jowhar News, By C/casiis Golf

 

Leave a Reply